Diario de Noticias de Álava egunkariak antolatutako beste AgroAraba edizio batean parte hartu dugu
Aste honetan, LURSAIL Arabako kideok AgroAraba topaketaren beste edizio batean izan gara. Ekitaldi hori Diario de Noticias de Álava egunkariak antolatu ohi du, Arabako lehen sektorearen errealitatea nabarmentzeko eta etorkizuneko erronkez eta hautabideez hausnartzeko.
Topaldian jende ugari bildu da, bai administraziokoak, bai sektorearekin zerikusia duten erakunde eta enpresetakoak, hainbat jarduera-eremutakoak; aniztasun horrek eztabaida eta ikuspegi partekatuak aberastu ditu jardunaldian zehar.
Bileran zehar, Arabako eta Euskadiko nekazaritzako elikagaien sektorearen oraina eta etorkizuna markatzen dituzten gai nagusiak jorratu ziren: nekazaritza-ereduaren jasangarritasuna eta errentagarritasuna, belaunaldien arteko erreleboa, Nekazaritza Politika Bateratua, digitalizazioa eta bertoko produktuaren kontsumoa, besteak beste.
Eztabaida bi gai-mahairen inguruan antolatu zen: bata, eraldatzen ari den sektorearen finantzaketari, teknologiari eta jasangarritasunari buruzkoa. Bestea, politika publikoei eta ikuspegi estrategikoari buruzkoa. Eztabaida-mahai bakoitzean, hasieran, lau hizlarik hartu zuten parte; ondoren, parte-hartzaileek parte hartzeko aukera izan zuten, nork egoki zeritzona azal zezan.
Digitalizazioari ekin zitzaionean, sektoreari tresna egokiak eta baliozkotuak emateko premia teknikoa aipatu zen, bai eta ustiategietan aldaketa bultzatzeko premia kulturala ere, datuen tratamenduan oinarritutako teknologian oinarritu ahal izateko.
LURSAIL Araban dihardugunok azpimarratu nahi dugu digitalizazioa egiaztagarria dela egun sektorean, Europako Batzordearen datuek erakusten dutenez, baieztatu baitute ustiategien % 93k baino gehiagok aplikazio edo prozesu informatiko bat erabiltzen dutela. Hala, erronka nagusia da teknologia aurreratuak txertatzea, teknologia horien ezarpen-maila askoz ere txikiagoa baita. Konponbideetako bat izan daiteke teknologiarekin, trebakuntzarekin, ezagutza erabiltzaileei transferitzearekin eta landa-inguruneko komunikazioak hobetzearekin loturiko kostuak finantzatzea.
Gai hauek ere izan ziren hizpide: nekazaritzako ustiategietara egokitutako finantzaketa-eredu baten beharra eta errentagarritasun ekonomiko jasangarri eta eraginkorren ereduak zehazten aholkatu eta lagunduko duten kudeaketa-zentroen eskutik joateak duen garrantzia.
Horren hartitik, adierazi nahi dugu elkarte, kooperatiba eta sektore-taldeen -80ko hamarkadan sortutakoak- egungo egituraketa erabakigarria izan dela sektoreak azken hamarkadetan izan duen bilakaerarako, eta etorkizunerako bidean, asoziazionismoari balioa ematen jarraitu behar dela eta haren antolamendu-ereduari buruzko gogoeta egin behar dela, formula eraginkorrenak eta egungo testuingurura egokitutakoak hartzeko helburuarekin. Azken finean, lehen sektorea garatu eta indartzeko, ezinbestekoa da teknologiak txertatzea eta egituraketa egokia izatea, eta horiek maila guztietan zeharka aplikatzea: produkzioan, aholkularitza teknikoan, ikerketan eta finantzetan, esku hartzen duten egitura guztien arteko koordinazioa bermatuta. Horrek guztiak aukera ematen du ustiategietan erabakiak hobeto hartzeko eta ekonomikoki errentagarriagoa, ingurumenaren aldetik jasangarriagoa eta sozialki orekatuagoa den nekazaritza-sektore baterantz aurrera egiteko.